Un total de 20 mulleres de Rois participan no curso de Muller Dixital, nivel básico, que hoxe comezou a impartirse no edificio multiúsos. Esta formación, de carácter gratuíto, está dirixida a mulleres en situación de desemprego ou demandantes de mellora de emprego. O obxectivo principal do curso é eliminar o medo á tecnoloxía e aprender a facer uso da mesma.
O curso ten unha duración de 40 horas e desenvólvese de luns a venres, de 9.15 a 13.14 horas ata o 18 de novembro. Complementarase cun módulo de igualdade, de 5 horas, que se impartirá os días 21 e 22 de novembro. Está impartido pola informática Marisol Medina Morales.
A primeira sesión consistiu na presentación do curso e das participantes. As alumnas tamén aprenderon a rexistrar a súa pegada dixital no sistema Cubite; a configurar as tabletas que se lles entregaron e a crear un enderezo electrónico.
Ao longo desta formación tamén recibirán nocións sobre a historia da evolución informática e coñecerán a terminoloxía básica para poder desenvolverse no entorno dixital. As participantes traballarán co ordenador, a tableta e o teléfono móbil, empregando as ferramentas dispoñibles tanto en Google como en Microsoft para traballar na nube ou para, por exemplo, renovar a demanda de emprego cos caracteres DARDE, pedir ou xestionar unha cita médica, o uso da chave 365 ou consultar e como descargar unha vida laboral, entre outros contidos.
Unha vez rematado o curso básico en competencias dixitais, programarase outro avanzado ao que accederán as mulleres que superen a formación inicial e aquelas que xa teñan coñecementos dixitais.
O curso de competencias dixitais básicas para mulleres está organizado pola entidade de formación Muller Dixital, en colaboración do Concello de Rois.
