Tres camións da empresa roisense Transportes Carnota González chegarán mañá as localidades valencianas de Alfafar e Aldaia con axuda humanitaria para as vítimas da DANA recollida polos concellos de Rois, Padrón e Rianxo. Ramón Tojo e Arxo Arca, alcaldes de Rois e de Padrón, respectivamente, agradecen a colaboración da veciñanza e das empresas implicadas con esta iniciativa
Produtos de limpeza, sanitarios e de hixiene persoal para o coidado de bebés e anciáns, alimentación non perecedoira para todas as idades; apeiros de limpeza e botas de auga, roupa, auga e leite conforman gran parte da axuda humanitaria que traslada ata Valencia de xeito gratuíto Transportes Carnota González.
Mario e Luis Carnota, propietarios da empresa de transporte, explican que se ofrecen a trasladar o material ata Valencia, porque levan anos traballando nesa zona e teñen amizades.
Dous dos camións dirixiranse ao municipio de Alfafar. “Contactamos co alcalde e quedaron de esperarnos para organizar, dende o Concello, a descarga de dous camións para repartir a axuda entre a veciñanza”, sinala Mario Carnota. O outro tráiler dirixirase a un centro hípico de Aldaia, que está moi preto do centro comercial de Bonaire, engadiu o empresario roisense.
Ramón Tojo agradeceulle aos dous irmáns Carnota, así como ao resto da veciñanza, a súa colaboración desinteresada nuns momentos nos que tanta xente o está pasando mal.
Anxo Arca reiterou o agradecemento aos transportistas, e tamén a toda a veciñanza que colaborou coa iniciativa, destacando a implicación das empresas e entidades padronesas Almacenes Eladio, perruquería A de Aarón, Club Ciclista Padronés, Club Deportivo Sar e a todas as persoas voluntarias que axudaron a recoller e clasificar o material.
GES de PadrónAdemais desta axuda humanitaria, e respondendo ao chamamento realizado pola Federación Española de Municipios e Provincias para mobilizar recursos, a semana pasada trasladáronse a Valencia cinco efectivos do Grupo de Emerxencias Supramunicipal (GES) de Padrón que estiveron a realizar achiques, limpezas, buscas e retiradas de vehículos na zona afectada pola DANA, entre outras tarefas.
