“Santo Isidro Labrador quita a auga e pon o sol”. Así fala o Refraneiro galego de Xesús Taboada Chivite do momento no que, segundo a tradición, comeza a época de bo tempo. En Rois é motivo de celebración e de honrar ao patrón do municipio, nunha festa que reúne a veciños, veciñas e visitantes na semana arredor do 15 de maio e que presenta unha variada oferta cultural, gastronómica, lúdica, musical e deportiva.

A programación das festas do Santo Isidro é moi extensa, pero talvez un dos actos que esperta máis expectación é o xantar popular, un espazo de encontro no que se dan cita centos de comensais. Este é tamén o momento do pregón, ofrecido por persoas vencelladas á nosa terra; das homenaxes Santo Isidro Labrador e Toda unha vida, esta última á persoa de máis idade do municipio; e da entrega dos premios do cartel anunciador da festa e do certame artístico e literario. Os actos do día grande do Santo Isidro inclúen tamén a misa solemne na igrexa parroquial e a música, que non pode faltar.

O programa festivo complétase cunha feira agrícola con exposición de maquinaria e de animais de raza autóctona galega, de artesanía e de produtos galegos, probas de habilidade no manexo de tractores, xogos populares, espectáculos e música de grupos tradicionais, orquestras e charangas.

E, por se fose pouco, coincidindo coas festas patronais tamén se organizan eventos deportivos, como andainas ou probas ciclistas que animan a compartir experiencias e a gozar ao aire libre dese sol que “pon” o Santo Isidro Labrador.

A canteira musical tradicional ten un importante peso en Rois. Proba disto é o Festival Rois NaturFest, que xurdiu en 2018 da unión de forzas do Concello e do Obradoiro de Cultura Tradicional Chorima para fusionar dous eventos que se viñan celebrando con moita sona na comarca: o Rois Arrasa!!! e o Naturfest.

Non hai en Rois parroquia sen festa. Ducias de celebracións forman parte da nosa forma de vida e nelas veciñanza e visitantes comparten momentos de ocio, de encontro cos achegados e tamén coas tradicións da nosa terra.