O Concello de Rois abre a convocatoria do Concurso de Carteis do Santo Isidro Labrador 2026, unha iniciativa que permitirá escoller a imaxe oficial das próximas festas patronais e que busca implicar a veciñanza na promoción dunha das citas máis destacadas do calendario festivo local.
O certame está dirixido a todas as persoas que teñan cumpridos 14 anos antes do 31 de decembro de 2025. Cada participante poderá presentar un máximo de dous traballos, que deberán contribuír a enxalzar o municipio e a esencia das festas do Santo Isidro. As técnicas son libres, pero o cartel deberá presentarse en formato vertical tamaño A3 e incluír de maneira visible e destacada a inscrición “FESTA DO S. ISIDRO LABRADOR 2026”.
Como novidade destacada nesta edición, as bases recollen expresamente que non se admitirán traballos creados total ou parcialmente mediante sistemas de intelixencia artificial, xeradores automáticos de imaxe ou ferramentas de creación automatizada. O Concello reforza así o seu compromiso coa creación artística persoal e coa autoría propia, polo que a participación implica a declaración responsable de que a obra é orixinal e realizada integramente pola persoa autora.
Ademais, non serán admitidos aqueles carteis que inclúan contidos que fomenten a violencia, o racismo, a xenofobia ou calquera forma de discriminación, ou que atenten contra a dignidade das persoas.
As obras poderán enviarse por correo electrónico ao enderezo inscricions@rois.gal, achegando a documentación requirida, ou presentarse fisicamente no Concello de Rois, no lugar de Samil 1, Oín (15911 Rois, A Coruña). No caso de envío postal, deberá constar o selo de Correos coa data dentro do prazo establecido.
O prazo de presentación abrirase ao día seguinte da publicación da convocatoria na web municipal e permanecerá aberto ata o venres 10 de abril de 2026 ás 14.00 horas.
Un premio de 200 euros e a imaxe oficial das festas
O concurso establece un premio único de 200 euros, que poderá declararse deserto se así o decide o xurado. A obra gañadora converterase na imaxe oficial do Santo Isidro Labrador 2026 e pasará a ser propiedade do Concello para a súa reprodución e difusión, facendo constar sempre o nome da persoa autora.
A entrega do premio realizarase no marco da programación das festas patronais. Desde o Concello anímase a todas as persoas con inquietudes creativas a participar e a contribuír, coa súa visión artística, a darlle forma á imaxe do Santo Isidro 2026.
As bases e as follas de inscrición poden descargarse nos arquivos adxuntos.
