A conselleira de Promoción do Emprego e Igualdade, María Jesús Lorenzana, clausurou esta mañá en Padrón o obradoiro dual de emprego Comarca do Sar 2021 organizado de xeito conxunto polos concellos de Padrón, Dodro e Rois, e que contou cun investimento por parte da Xunta de case 347.000 euros para formar a 18 persoas, tres das cales xa atoparon traballo. Lorenzana anunciou a concesión dun novo obradoiro de emprego para este ano.
No acto de clausura estivo presente o alcalde de Rois. Durante a súa intervención, o alcalde de Padrón felicitou aos participantes “polo magnífico traballo” que fixeron nestes nove meses e volveu destacar a importancia de “buscar obxectivos comúns” entre os concellos promotores, “porque a unión fai a forza” para seguir mellorando a calidade de vida da veciñanza.
Durante nove meses un total de 18 alumnos e alumnas formáronse no obradoiro dual e emprego Comarca do Sar 2021 en dúas especialidades: realización de operacións auxiliares de acabados ríxidos e urbanización, por unha banda, e actividades auxiliares para a conservación e a mellora de montes, pola outra.
A conselleira destacou que as persoas participantes tiveron a oportunidade de poñer en práctica os coñecementos adquiridos, realizando actuacións de acondicionamento e rehabilitación que contribuíron a mellorar os núcleos urbanos e os espazos naturais desta comarca. “Unhas actuacións que repercutiron positivamente na vosa contorna e protexeron un dos bens máis prezados que temos: o noso medio ambiente”, subliñou.
Puxo como exemplo a efectividade deste tipo de actividades para abrir novas portas ao mercado de traballo. Lorenzana, indicou neste senso, que tres dos alumnos participantes no taller atoparon xa un emprego.
Limpeza de espazos público e novo tellado nos Dices
Durante os nove meses que estiveron formándose, o alumnado-traballador da modalidade de conservación e mellora de montes limpando e acondicionando diferentes espazos públicos, como os arredores do local de veciños de Sorribas, e das unitarias de Sorribas e dos Dices, ademais da finca municipal de Samil e varias áreas recreativas, entre outras.
Os e as participantes no módulo de acabados ríxidos e urbanización repararon o tellado da escola unitaria dos Dices.
En Padrón fixeron melloras nalgunhas rúas do casco histórico, cambiando o enlousado e as canalizacións e ampliando a franxa de seguridade nos accesos ao monte San Gregorio ou monte do Santiaguiño. En Dodro realizaron melloras en diversas pistas forestais e no entorno dos hórreos de Lavandeira, Imo e Dodro.
“Podedes estar orgullosos, porque fixestes un gran traballo”, lles dixo o alcalde de Padrón durante o acto, que congregou no auditorio padronés, a directora xeral de Formación e Colocación, Zeltia Lado, ao alcalde de Dodro, Xabier Castro, ás técnicas de emprego dos tres concellos e ao persoall docente e alumnado do obradoiro Comarca do Sar 2021.
Diplomas e novo obradoiro
Ao rematar o acto, os alumnos recibiron un diploma e un certificado de profesionalidade. Ademais, a conselleira dixo que a Xunta mantén firme o seu compromiso con este tipo de iniciativas demandadas polos concellos e a veciñanza e anunciou que en 2022 Padrón, Dodro e Rois contarán cunha nova edición do obradoiro dual hoxe clausurado.
A ese novo obradoiro destinaranse 504.000 euros, case 158.000 euros máis que o pasado ano, o que permitirá formar 20 veciños e veciñas en situación de desemprego durante 12 meses (o actual durou 9) en materia de revestimentos e na atención sociosanitaria a persoas dependentes.
Incremento orzamentario
Lorenzana aproveitou o acto para anunciar a alza do 25% no orzamento previsto para a convocatoria 22-23 dos obradoiros duais de emprego, co obxectivo de “podermos atender a totalidade das solicitudes admitidas”, subliñou. Esta ampliación de crédito de 10,5 millóns de euros, publícase hoxe no Diario Oficial de Galicia (DOG) e permitirá incrementar ata os 52,6 millóns de euros o investimento da Xunta para estes anos. Estamos, segundo indicou, ante “un significativo aumento, o maior dos últimos 12 anos, co que se realizarán 101 obradoiros duais de emprego na nosa Comunidade e se ofrecerán contratos de formación e aprendizaxe a 2.001 persoas durante doce meses, tres máis que ata o de agora”.
