O Concello de Rois está a adquirir novos fondos para a Biblioteca Pública Municipal, cunha selección destinada a renovar os seus andeis e ofrecer novas propostas para diferentes idades e gustos lectores. As incorporacións permitirán acompañar tanto as últimas lecturas do verán como o inicio do novo curso.
A selección para o público adulto reúne obras de misterio, suspense, narrativa contemporánea, novela histórica e grandes historias humanas.
As persoas afeccionadas á intriga poderán atopar novas propostas de María Oruña, Manel Loureiro, Freida McFadden e A. J. Finn. A oferta de misterio complétase co humor, a retranca e os detectives peculiares presentes nas obras de Leonie Swann e Dorothy L. Sayers.
A narrativa contemporánea e intimista contará con libros de Manuel Vilas, Manuel Jabois, Delphine de Vigan, Kim Ho-Yeon e M. L. Stedman, autores que abordan diferentes experiencias persoais e historias humanas.
A novela histórica tamén terá presenza nos novos fondos da biblioteca. Entre as incorporacións figura El baile de las criadas, de Marta Platens, xunto con obras de Vanessa Chan, Laura Ramos e Sophie Elmhirst.
Novidades para o público infantil e xuvenil
A renovación dos fondos inclúe unha selección de libros para a infancia e a mocidade, con propostas pensadas para fomentar o gusto pola lectura, aprender e compartir momentos en familia.
Para as primeiras idades incorporaranse contos e álbums ilustrados como El Principito, As aventuras do elefante Elmer, O coelliño branco ou Papá, por favor, achégame a Lúa, de Eric Carle.
As nenas e nenos que comezan a ler de maneira autónoma poderán gozar de novos volumes de sagas como Anna Kadabra, ademais de libros de xogos e procuras visuais como Busca a miña casa.
A selección tamén inclúe obras informativas e prácticas sobre animais, natureza, experimentos e actividades para o outono. O fútbol estará presente a través da Guía do Mundial 2026.
Outro dos ámbitos atendidos é o das emocións e o desenvolvemento persoal. Títulos como As emocións, Álex ten vergoña ou Menstruación en marcha permitirán abordar cuestións relacionadas coa empatía, a diversidade e o coñecemento do propio corpo.
Renovación das coleccións bibliográficas
A adquisición destas obras enmárcase na convocatoria de 2026 da Xunta de Galicia de axudas ás entidades locais titulares de bibliotecas públicas e/ou axencias de lectura integradas na Rede de Bibliotecas Públicas de Galicia. Esta liña está destinada á adquisición de novidades editoriais en galego e á mellora das coleccións.
Con estas incorporacións, a Biblioteca Pública Municipal de Rois continúa renovando os seus fondos para facilitar o acceso da veciñanza á lectura e ofrecer propostas adaptadas aos distintos públicos.
